| |
| M.Şerîf Muştak: Min jibîr nekin! |
| 2013-01-22 11:22 |
|
|
Bi xatirê we hemû dost, bira û hejîkerên dostaniya min.
Navê min M.Şerîf Muştak.
Ji gundê Cinibrê me.
Gundê ser bajarê Cizîra Botan.
Piştî xwendineke dûr û dirêj bûme mamostayê dibistana bilind
Hê ji biçûktiya xwe ve ketim refên bo azadiya Kurd û Kurdistanê.
Li gor îmkanên xwe min bîr û dîtinên xwe ji raya giştî ya Kurd û Kurdistanê re gotin.
Di vê pêvajoyê de min gelek zehmetî dît.
Ketim zindanan.
Ji aliyê rejîma kemalîst ve tadarî û îşkenceyan li min hatin kirin.
Lê min ti caran serê xwe ber dijmin netewand!
Min her bexwedana xwe ya bo azadiya Kurdistanê berdewam kir.
Lê ez jî wek gelek welatperwerên Kurd mixabin neçarî derbederiyê bûm.
Derketim welatê Almanya-welatê xeribiyê.
Min li wir her xebata xwe ya bo azadiya Kurd û Kurdistanê berdewam kir.
Lê mala bavê feleka min xayîn xira bibe.
Her nexweşiyên ji ber tadarî û îşkenceyên kemalîstan dev ji min bernedan.
Asarên wan îşkenceyan birînên kûr di laşê min de vedabûn.
Lê min her berxwe da.
Di vê jiyanê de daxwaza min yek tenê bû:
Ew jî ez bi çavên serê xwe Kurdistana xwe ya azad û serbixwe bibînim.
Min beşek yê azad dît.
Lê mixabin ez her li benda azadiya bakurê Kurdistanê û beşên dî mam.
Mixabin vê bendewariya min dom kir.
Û hê jî dom dike.
Li aliyê dî jî, dilê min bi min re xayîn derket û nexwest alîkariya min bike.
Dilo, malxirabo te nekarî xwe ber êş û janan bigirî!
Tu zû teslîmî qeder û felekê bû.
Te nekarî wek min li ber xwe bidî.
Min dixwest ez ji kêmahî ve bîst salek dî li ber xwe bidim.
Bîst sal ne tiştekin, malxirabo dilo!
Te ez di pêncî saliya min de hiştim û dev ji min berda!
Heyf û sed mixabin!
Te kûlên min bi min re hêlişt!
Te heval, dost û hejîkerên min birîndar kir!
Ma însafa te ji binî nêmabû?!
Wey mala te sed caran xirab bibe dilo xayino!
Min digot qey tu çeqmeqa min ya jiyanê bû.
Baweriyek min mezin bi te hebû.
Lê te ez xapandim!
Te jiyana min di pêncî saliya min de bi xwe re bir!
Te neheqiya herî mezin li min kir.
Lê ez çawa bikim, ev jiyan e!
Ez niha diçim, berê xwe didim Cinibira xwe!
Cihê bav û kalên xwe.
Li wir dikevim xewa xwe ya ebedî.
Lê ez dê her li benda azadiya Kurd û Kurdistanê bim.
Bi xatirê we hemû Kurdistaniyan.
Taybetî kekê Cuwan!
Bi xatirê te.
Dizanim tu îro bi vê xatirxwaziya min birîndarî.
Çavên te tejî girîne.
Min dilê te jî bi yê xwe re birîndar, jar û reben kir!
Lê çi bikim ez bûme qurbana feleka xayîn û qedera bêbext.
Qedera min wisa bûye.
Bi xatirê te kekê min Cuwan!
Bi xatirê we hemû dost, bira û hejîkerên dostaniya min.
Nivîs: Dr.Cuwan Heqi
Dost û birayê biçûktiyê yê M.Şerîf Muştak
(Gulan-2009, serwext.com) |
|